Esta rebusta fortificación -los murios algamen una grosez de 1,40 metros- ta venceyada estrechamente a la Cámara Santa de la catedral. Nun se tienen datos inequívocos sobre la so construcción, pero sí abondos argumentos arqueolóxicos, epigráficos y topográficos p´autorizar la so datación nos mesmos años que la Cámara Santa, esto ye, escontra 884-885. Paez tratase de la fortificación destinada a protexer d´asaltos pirates -normandos o musulmanes- l´aula de l´ayalga de la catedral, que se pue identificar cola Cámara Santa.

Esti edificiu, güei actual campanariu románicu de la catedral, asitiáu nel llau más desamparáu de la Cámara Santa, consta de dos fábriques estremaes, que son productu de dos impulsos constructivos.

El primeru d´ellos constitúi´l cuerpu inferior de la torre. Trátase d´una construcción de planta cuadrangular irregular, ensin vanos esteriores hasta un altor considerable, y con una puerta rebusta na fachada Norte, que dexa comunicase cola basílica de San Salvador. L´apareyu amuesa la característica fábrica altomedieval de bloques rectangulares pequeños, asitiaos en fileres regulares. Nel interior el muriu presenta socesivos retranqueos, destinaos tanto a endelgazar la espesura como a dexar l´allugamientu de los forxaos de madera de los pisos.

Una escavación arqueolóxica recién permitió saber qu´asitia directamente sobre la roca madre, ensin pestaña de cimentación, nun siendo nel llau Norte, onde sí la hai.

Nel postreru terciu del sieglu XI -probablemente sol pontificáu d´Ariano (1073-1094)- a esta fortificación superpúsose-y un cuerpu de campanariu, abiertu al esterior per aciu de vanos pareaos en cada fachada, asitiáu sobre bóveda d´arista rebaxada y rematáu por bóveda esquifada. L´apareyu ye de sillería cuidada, executada por apenes tres operarios. L´interior de la bóveda cimera ta articuláu por dos arcos faxones cruciaos nel sentíu de les exes, a los que correspuenden pel esterior estribos sobre ménsules soportaes por canecinos animales. Los ocho vanos rematen n´arcos de mediu puntu sobre columnes con dieciséis capiteles mayoritariamente vexetales.

Tipolóxicamente, la Torre Vieya comparte traces constructives, en proyectu y execución, con otres fortificaciones mariniegues conocíes atribuyíes igualmente a Alfonso III: les torres d´Oeste, en Catoira, cerrando la entrada a la desembocadura del Ulla y protexendo l´accesu a Santiago de Compostela, santuariu especialmente curiáu por Alfonso III, verdaderu creador de la diócesis y impulsor del cultu al apóstol.
 

Accesos

Uviéu. Catedral de San Salvador. Plaza d'Alfonso II El Castu.

 

Horarios

Xineru, febreru, payares y avientu

  • De llunes a sábados, de 10:00 a 13:00 y de 16:00 a 17:00 hores.
  • 24 y 31 d'vientu, de 10:00 a 13:00 hores.
  • Zarrao, 1 y 6 de xineru, 1 de payares y 8 y 25 d'avientu.

Marzu, abril, mayu y ochobre

  • De llunes a vienres, de 10:00 a 13:00 y de 16:00 a 18:00 hores.
  • Sábados, de 10:00 a 13:00 y de 16:00 a 17:00 hores.
  • 17 y 18 d'abril, de 10:00 a 14:00 hores.

Xunu

  • De llunes a vienres, de 10:00 a 13:00 y de 16:00 a 19:00 hores.
  • Sábados, de 10:00 a 13:00 y de 16:00 a 17:00 hores.
  • 10 de xunu, de 10:00 a 13:00 hores.

Xunetu y agostu

  • De llunes a vienres, de 10:00 a 19:00 hores.
  • Sábados, de 10:00 a 17:00 hores.
  • Zarrao, 15 d'agostu.

Setiembre

  • De llunes a vienres, de 10:00 a 18:00 hores.
  • Sábados y del 15 al 20 de setiembre, de 10:00 a 17:00 hores.
  •  Zarrao, 8 y 21 de setiembre.

Depués de pesllar, pue permanecese dientro una hora más.

Pesllao: los domingos nun se dexen visites turístiques.

 

Tarifes complexu catedraliciu

  • Xeneral: 8 €.
  • Mayores de 65 años: 7 €.
  • Escolinos de 13 a 17 años y alumnáu universitario (con carné) menores de 25 años: 5 €.
  • Pelegrinos con credencial, families numberoses con tarxeta acreitativa y persones desemplegaes con documentu acreitativu: 4 €.
  • Grupos de más de 15 persones: xeneral: 6 €/persona; acompañaos de guía acreitáu pol cabildu: 5 €/persona.
  •  Gratuito: menores de 12 años acompañaos d’un adultu, persones con discapacidá con tarxeta acreitativa y escolinos de Primaria con profesor/a. Consultar otres gratuidaes.

La visita va ser parcial (Cámara Santa, Muséu y Claustru) cuando haya celebraciones llitúrxiques. Nesi casu va aplicase una rebaxa d’alcuerdu cola tarifa correspondiente. 

Los martes el Muséu ye gratuitu, polo que s’aplica 1 € de reducción na tarifa del conxuntu catedraliciu.

La visita al complexu catedraliciu nun incluye la xubida a la torre, que ye una visita independiente.

 

Contactu

Tfnu: 985 21 96 42 (Cámara Santa) - 985 20 31 17 (muséu).

Información y compra d'entraes: catedraldeoviedo.com.