La pieza más significativa ye la celosía que güei s´atopa asitiada na fachada occidental, sobre´l pórticu. La so contorna repite´l modelu de la del pórticu meridional de Valdediós, rectangular rematáu en semicírculu. La idea decorativa consiste nun tallu vexetal vertical del que broten cañes paraleles a entrambos llaos curvaes sobre sí mesmes y con abondoses volutes. Tanto nel tueru vertical como nes cañes, los tallos vense atayaos por enanches acorazonaos, con un corazón incisu nel interior.

Esti templu, asitiáu na marxe esquierda de la ría de Villaviciosa, conserva casi na so integridá la nave d´un edificiu prerrománicu, identificada y documentada nos trabayos arqueolóxicos fechos nos años 2002 a 2004.

Les escavaciones arqueolóxiques permitieron demostrar que la nave del templu actual, dende los cimientos hasta la cornisa respuende al primer impulsu constructivu del edificiu y foi alteriada nel sieglu XII pola incrustación de la puerta meridional y l´arcu triunfal d´accesu al nuevu santuariu. Trátase d´una fábrica de cuidada mampostería de llábanes caliares, con sillares d´arenisca potentes nes esquines. Por ello, puede asegurase que les tres ventanes de la fachada meridional y la de la septentrional s´atópen in situ, amás de los dos modillones de cornisa asitiaos nos esquinales NO y SO de la nave.

Como la de Valdediós, esti diseñu respuende a la copia d´un prototipu paleoislámicu d´orixe andalusí, interpretáu con llibertá ya incomprensión por un escultor asturianu.

L´edificiu dispunxo de tres ventanines bífores en cada muriu llateral de la nave. Caltién les tres de la fachada Sur y una na fachada Norte. Toes reproducen el mesmu tipu: cargaderu monolíticu qu´apoya sobre frontales d´una pieza, configuraes por columnines entregues, con capitel troncopiramidal llisu y collarín. El modelu directu d´estes pieces atópase igualmente nes ventanines de les fachaes Norte y Sur de San Salvador de Valdediós.

A lo último, caltiénse un potente modillón de rollu únicu na esquina Noroeste de la fachada Oeste, al que s´opón el fragmentu del so paralelu nel esquinal opuestu de la mesma fachada, identificáu igualmente nesta última restauración. Pertenez al tipu más común de l´arquitectura asturiana.

 

Accesos

En Bedriñana, Villaviciosa.

 

Horariu

Xunetu y agostu 

  • Martes y vienres, de 17:00 a 19:00 hores.

 

Visites

Visites de baldre.