Santuyano - Centro Prerrománico Asturiano

Alfonso II edificó una ilesia n´honor de San Xulián y Basilisa, de gran tamañu y almirable harmonía.

Mandáu construyir por Alfonso II (791-842), conforma un templu de planta basilical, de cabecera triple, tres pórticos, dos llaterales y otru allugáu al oeste. Consta de tres naves, la central más ancha y alta que les llaterales y un transeptu destacáu n´altor, allumáu por un gran vanu abiertu nel llau sur y separáu de la nave central por un arcu de trunfu. Les naves tán dixebraes por arqueríes de mediu puntu de lladriyu que sofiten en pilares de sección cuadrada.

La decoración escultórica reduzse a l´arquería interior de la capiya mayor, onde se caltienen ocho capiteles corintios reutilizaos, de posible cronoloxía visigótica. Son pieces de gran perfección técnica, llabraes en mármol, procedentes probablemente d´un taller allugáu en Tierra de Campos. Destaquen tamién dos plaques de mármol decoraes con hexágonos y motivos florales que fueron reaprovechaes como revestimientu interior de los frontales de la capiya central.

De notable valor arquitectónicu, la importancia trescendental de Santuyano finca nel caltenimientu de la decoración pictórica interior, ensin paralelu n´Europa Occidental, pola so estensión, grau de caltenimientu y programa iconográficu. La técnica al frescu, los motivos xeométricos, vexetales y arquitectónicos y el calter anicónicu del programa, remiten a prototipos clásicos pompeyanos del sieglu I y modelos de la Baxa Antigüedá. La maxestá del interior de Santuyano déxanos valorar afechiscamente´l nivel cultural algamáu na corte uvieina.

L´edificiu tamién tuvo revistíu al esterior, cubriendo la probeza del apareyu murariu. El llucíu esterior d´estos edificios foi abondo atestiguáu, polo que la imaxe actual ye engañosa: hemos de facer l´esfuerzu d´imaxinalos enfoscaos y pintaos dafechu. Anguaño debe plantegase devolver a esta arquitectura´l so aspectu orixinariu, especialmente onde se caltienen pintures interiores, por razones de protección y caltenimientu.