Ye unu de los exemplos más perfectos del tipu basilical asturianu. Consta de tres naves, dixebraes por dos arqueríes de cuatro tramos, cabecera tripartita con tres cámares ciegues superpuestes, dos habitaciones abiertes a les naves llaterales y un antecuerpu occidental tripartitu en planta y doble n´alzáu, con un pórticu y dos cámares na planta baxa y una tribuna y otres dos dependencies na cimera. Como anexos, dispónense al Sur un pórticu y una capiya. Toles dependencies cúbrense con bóvedes de cañón en piedra toba.
La basílica de San Salvador de Valdediós ye la obra más significativa de l´arquitectura de fines del sieglu IX n´Asturies. Foi consagrada´l 16 de setiembre de 893 por siete obispos; los sos nomes recuéyense na inscripción consagratoria asitiada na denominada capiya de los obispos, na esquina suroriental del templu.
Agora bien, un analís arqueolóxicu de paramentos, pintures y estructures constructives dexa suponer qu´a la fecha de consagración responderíen solamente´l pórticu llateral del Sur y les pintures murales, en cuantes que´l templu sería construyíu con anterioridá, quiciabes escontra 875, a xulgar polos argumentos paleográficos de les inscripciones del interior del templu. Caltiénense les inscripciones dedicatories de les tres capiyes, San Salvador, San Xuan Bautista y Santiago, y una inscripción sobre la puerta occidental, de calter conminatoriu.
El pórticu llateral meridional difier del restu del templu. Ye anterior a la decoración pictórica del interior del edificiu y presenta sillería magnífica de piedra arenisco y cubierta en bóveda de cañón con arcos faxones que sofiten sobre columnes adosaes a los estribos de la paré y sobre capiteles-ménsula asitiaos nel paramentu interior del muriu del pórticu. Una arquería con seis arcos adosa a los paramentos del muriu de la nave y de la cámara llateral.
La capiya de la esquina suroriental ye de difícil datación. La so función paez ser la de protexer la llábana de consagración. Ta llevantada con apareyos diversos, alternando filaes de sillares regulares con obra de mampostería irregular. La cubierta ye de bóveda de lladriyos.
La escultura arquitectónica ta formada por tres conxuntos de pieces. Los soportes del interior son pilares monolíticos, coles característiques impostes molduraes asturianes. Sicasí, los ingresos a les tres capiyes de la cabecera ennoblécense con arcos triunfales sobre pares de columnes con bases y capiteles. Los de la capiya central son creaciones orixinales asturianes. Otra manera, nes capiyes llaterales recurrióse al reempléu de capiteles espoliaos de granitu. Nel pórticu meridional y nel occidental, los 24 capiteles demuestren una destacada conocencia de mostrarios andalusíes, a los que sicasí s´ensertó nun tipu estructuralmente asturianu.
L´interior del edificiu caltién restos considerables de pintures na capiya central, na capiya norte, na bóveda de la nave central y nes dependencies central y meridional del pisu cimeru del antecuerpu occidental. Perdiéronse les superficies más amplies, como los paños ente ventanes y arqueríes divisories na nave central, y los paños de los murios nes llaterales.
Dende´l puntu de vista de la morfoloxía espacial, Valdediós ye un exemplu acabáu de la combinación d´una traza basilical col abovedamientu completu de tolos espacios, lo qu´amenorgó l´amplitú del interior y la capacidá lluminosa. La riqueza de la so decoración y el datu de la so consagración al cargu de siete obispos mueven a pensar qu´en tal circunstancia hubo d´intervenir la corte, presidida nel momentu por Alfonso III (866-910).
Accesos
Villaviciosa. Valdediós.
Accesu per ctra. AS-113
Villaviciosa a La Secá.
Horariu
De ochobre a marzu
- De martes a sábado, de 10:30 a 13:30 hores.
- Domingo, de 11:00 a 13:30 hores.
- Cerráu, 1 y 6 de xineru y 25 d′avientu.
D'abril a setiembre
- De martes a sábado, de 10:30 a 13:30 y de 16:00 a 19:00 hores.
- Domingo, de 11:00 a 13:30 y de 16:00 a 19:00 hores.
- Cerráu, 8 y 18 de setiembre.
Cerráu, llunes.
Tarifes
- Xeneral: 6,5 €.
- Menores de 8 años: gratuitu.
- Grupos de más de 15 adultos: 5 €.
Otros descuentos, consultar.
Contactu
Tfnu: 985 97 49 66.
Reserves en monasteriovaldedios.com