N’Asturies caltiense el más completu y homoxeneu conxuntu d’arquitectura altomedieval de tol Occidente européu. Fecháu a lo llargo del sieglu IX y primeros años del X, nun tien oldéu pola so calidá y caltenimientu magníficu. El valor de l’arquitectura súmase a la estraordinaria orfebrería, y xuntos desenvuelven una fuerza comparable a la d’otres renacencies europees coetánees, pudiendo oldease al nivel alcanzáu poles cortes carolinxa o bizantina.
Esti arte constitúi’l testimoniu más importante de los raigaños históricos y de les tradiciones culturales orixinaries del Reinu d’Asturies. D’esti legáu, caltiénense doce templos y tres construcciones civiles.
Ente los primeres cúntense Santuyano (791-842), San Miguel de Lliño (844-850), San Pedru de Nora (sieglu IX), Santa María de Bendones (sieglu IX), Santa Cristina de L.lena (escontra 848), Santu Adrianu de Tuñón (consagrada en 891), San Salvador de Valdediós (consagrada en 893), San Salvador de Priesca (consagrada en 921), Santiago de Gobiendes (segunda metá del s. IX), Santa María d’Arbazal (sieglos VIII-X), San Andrés de Bedriñana (sieglu IX) y la Cámara Santa de San Salvador d’Uviéu (escontra 884).
Ente les construcciones civiles atópense Santa María de Naranco (altar dedicáu en 848), la denominada Torre Vieya de San Salvador d’Uviéu (probablemente coetánea a la Cámara Santa) y la fonte de Foncalada n’Uviéu (primer metá del sieglu IX). Otros templos asturianos caltienen partes atribuyibles al períodu altomedieval, como Santianes de Pravia (774-783) o’l testeru de Santiso d’Uviéu (791-842).
Dende 1985 seis monumentos del Prerrománicu asturianu son Patrimoniu Mundial de la UNESCO, por ser una amuesa relevante de la cultura del reinu cristianu d’Asturies, desenvuelta nel momentu de mayor rellumanza del emiratu de Córdoba, y pola notable influencia qu’exerció na posterior arquitectura europea.