Siguiendo la información recoyida na Crónica Albeldense, esti templu construyéronlu’l rei Silo y la so muyer Adosinda ente 774 y 783 “cuando esti asitió la corte en Pravia”. Concebida como ilesia palatina o oratoriu real y con funciones de panteón rexu, fundóse baxo l’advocación de los santos Xuan Apóstol y Evanxelista, Pedro, Pablo y Andrés y taría allugada cerca del conxuntu palaciegu del rei, anque entá nun se pudo identificar la localización orixinal. A la muerte del rei Silo nel 774, tanto’l conxuntu palaciegu como la ilesia conviértense en residencia monástica a onde se retira la reina Adosinda el 26 de payares del 785. Según la Crónica d’Alfonso III del añu 905, a Silo sotiérrenlu nel pórticu del templu de Santianes, convirtiéndose asina en panteón real d’alcuerdu cola tradición hispánica.

L’estáu primitivu de la ilesia llegó hasta nós gracies a les descripciones realizaes por dellos autores; ente estos figuren Ambrosio de Morales (1513-1591), Tirso d’Avilés (1516-1599) y Luis Alfonso de Carvallo (1571-1635). Estos testimonios son previos a la tresformación fecha por Fernando de Salas en 1637, momentu nel que la ilesia esperimenta cambeos sustanciales na estructura arquitectónica primitiva prerrománica. La creación d’un espaciu sepulcral dientro la ilesia pa la familia Salas supón la valtadura y ampliación de la capiya mayor, amás de la rotura y dispersión del conocíu acrósticu Silu princeps fecit, llábana epigráfica fundacional de la ilesia.

En 1894 descúbrense restos arquitectónicos importantes pertenecientes a la basílica orixinal prerrománica: una pilastra, quiciabes el podiu del ara d’altar, y dos canceles con unes dimensiones d’alredor de 1 metru d’altu por 0,5 metros d’anchu, decoraos con dellos motivos florales y xeométricos. El conxuntu de pieces treslladóse a la capiya de Xesús Nazarenu d’El Pitu (Cuideiru).

Nes escavaciones y trabayos de restauración realizaos a partir de 1975, baxo la dirección de José Menéndez Pidal, tópose una planta basilical con nave central de 8 metros de llargor y 5,5 metros d’anchu, xebrada de les naves collaterales, de 2,5 metros d’altor, por arqueríes compuestes por trés arcos de mediu puntu que posen enriba de pilastres. El templu presenta un transeptu de 4,5 metros d’anchu que s’estrema en tres espacios en correspondencia coles naves, siguiendo l’arquería hasta’l so alcuentru col muriu de la cabecera pente medies d’arcos diafragma.

Orientada escontra’l leste ábrese la cabecera, compuesta por un ábside únicu, de trazáu semicircular peraltáu a exa cola nave central. La so dimensión ye de 4,5 metros de diámetru interior y taría cubiertu por una bóveda de fornu. Pa fuera, l’ábside amosaría forma cuadrangular y nun tendría ábsides llaterales. Caltiénse una bona parte de la superficie del pavimentu del presbiteriu, conformáu por opus signinum, lo que-y da una calidá alta y riqueza singular.

Al oeste vemos el vestíbulu d’entrada, exentu, sobre’l que s’asitia una tribuna introducida en dómina moderna, qu’orixinariamente edificaríase cuando’l vestíbulu o pórticu se convirtió n’enterramientu real. A ella entraríase per una escalera interior, fabricada en madera. L’accesu al interior del vestíbulu dende fuera’l templu nun tendría puerta de zarramientu, mentes que la comunicación dende’l mesmu cola nave central faise per un vanu adinteláu con una lluz de 1,05 metros. Per fuera, l’edificiu recurre al apareyu de piedra o de cantería. Les esquines tienen piedres de cantería xeneralmente bien escuadraes puestes a fila y tizón. Como se pue ver, la basílica de San Xuan Evanxelista de Santianes tien unes característiques constructives que prefiguren en bona midida l’arquitectura prerrománica asturiana posterior.

 

Accesu

Santianes (Pravia).

 

Visites

La visita incluye la ilesia de Santianes y el muséu Prerrománicu de Santianes.

Nun se van facer visites hasta avisu nuevu. Nel tiempu en que se faen ye menester realizar reserva previa con, lo menos, un día d’antelación. Concertar visita na Oficina de Turismu de Pravia presencialmente, nel teléfonu 985 82 12 04 (Oficina de Turismu) o nel 684 64 37 40 (Muséu).

Información: praviaturismo.es/santianes-joya-prerromanico.

 

Tarifes

  • Xeneral: 3,5 €.
  • Neños/es de 12 a 16 años: 1,7 €.
  • Neños/es d´hasta 12 años: gratis.
  • Grupos de polo menos 15 persones. 1,7 €.
  • Grupos de polo menos 15 neños/es: 1,1 €.