Cada visitante somórguiase na sala inmersiva nun viaxe al traviés del tiempu pa observar a los dinosaurios y otros reptiles coetáneos qu’habitaron Asturies va 150 millones d’años, al traviés d’una proyección envolvente en trés pantalles onde se combina imaxe real de los entornos actuales cola superposición de recreaciones en 3D.
Nesti espaciu, el públicu pue “treslladase” hasta la playa de La Griega en Colunga pa ver les buelgues de saurópodos grandes; a los cantiles d’Arroyo Solero en Tazones (Villaviciosa), con rastros de pterosaurios, o a la playa de Tereñes en Ribeseya, con conxuntos de buelgues de dellos dinosaurios sobre sedimentos inclinaos.
Depués d’observar les buelgues que dexaron estos animales nel nuestru presente, va haber un “viaxe” hasta un pasáu reconstruyíu en 3D que dexa conocer a los tipos de dinosaurios y reptiles identificaos n’Asturies, comprender cómo orixinaron eses “pistes” fósiles qu’atopamos en La Costa de los Dinosaurios y descubrir los paisaxes qu’había nel Xurásicu.
L’equipu científicu del MUXA collaboró nel desenvolvimientu d’esti proyectu visual, asegurando’l rigor del conteníu onde s’esplica d’una forma prestosa cómo se formaron les buelgues de los dinosaurios, cómo yeren los ecosistemes y los animales que poblaron el Xurásicu n’Asturies o’l valor xeolóxicu y paleontolóxicu de La Costa de los Dinosaurios.
Una esperiencia visual y educativa sobre’l Xurásicu d’Asturies, accesible y estimulante pa públicu de toles edaes.
Más información sobre horarios y entraes pa la sala inmersiva (Misión DinoTiempo)
La sala inmersiva forma parte d’un proyectu financiáu con fondos europeos del Plan de Recuperación, Tresformación y Resiliencia.
Formulario de Contacto