sub1SELECT imagen FROM sub_secciones_web WHERE id='53'
Centro de Recepción e Interpretación del Prerrománico Asturiano
Facebook
Twitter
Instagram
Youtube
App Móvil

En Lena. Santa Cristina de L.lena

Santa Cristina de Lena

Información xeneral

Pola complexidá de la so distribución interior y la so planta, Santa Cristina de L.lena constitúi un casu únicu na arquitectura asturiana. Tien una entrada namás, lo que fala en favor d´un usu per parte d´una comunidá de fieles indiferenciada, puramente dedicada al serviciu d´un monesteriu. A esta impresión contribúi la riqueza del programa iconográficu que puede albidrase nos capiteles y celosíes del interior, y la maestría técnica del so proyectu, sometíu a relaciones métriques harmóniques.

Pa la so datación namá cuntamos con elementos indirectos, como la fecha d´una de les celosíes reutilizaes nel arcu triunfal -añu 643-, la cronoloxía que puede atribuyise a les restantes pieces reaprovechaes -sieglu VII- y la gran seguridá qu´esiste sobre l´usu que´l maestru de L.lena fixo del alzáu de Naranco. Lo qu´autoriza a proponer una fecha alredor del añu 850 y décades posteriores. L´aspectu actual del templu ye en bona parte la resultancia de la restauración efectuada nos años 1892-1893, a lo que s´amiesten los arreglos de les estroces carecíes na Revolución de 1934.

Trátase d´un edificiu de nave única, a la que s´adosen cuatro cuerpos salientes, alliniaos según los dos exes de simetría, que correspuenden a dos habitaciones llaterales, un pórticu con cámara superpuesta y una capiya sobreelevada. Tol perímetru llevántase sobre un zócalu. Los murios compónense esteriormente de fileres irregulares de llábanes y sillares caliares, acutando pa los esquinales la sillería a soga y tizón. Los paramentos tán percorríos regularmente por estribos, como elementos d´articulación mural. Namá se caltienen dos ventanes orixinales, asitiaes na fachada Norte de la cámara septentrional y na fachada Este de la capiya. Dambes son vanos tríforos, con columnines reaprovechaes provenientes d´espolios.

Nel interior, l´articulación de los murios consiste n´arqueríes ciegues que percuerren los paramentos Norte, Sur y Este. Nes enxutes centrales de les tres arqueríes dispónense cinco medallones y dos plaques rectangulares, con una bultable alcordanza del sistema de la sala central superior de Santa María de Naranco.

Nel sector oriental, l´espaciu presbiterial ta sobreeleváu y separáu por un llamativu arcu triunfal, sol que s´asitia´l cancel. Apórtase a él per aciu de dos escalinates llaterales. L´altar pudo disponese nel interior de la capiya, resultando casi invisible al públicu. A occidente álzase una tribuna, qu´avanza sobre l´espaciu de la nave, y aprovecha el buecu de la cámara asitiada sobre´l pórticu d´entrada. Esta estructura ye, ensin dulda, el productu d´una reforma constructiva. Paralelos tipolóxicos europeos autoricen fechar esta reforma a partir de fines del sieglu XI. Toles dependencies d´esti complexu interior abovedáronse con cañones construyíos en piedra toba caliar.

Delantre la capiya y delimitando escontra l´Oeste l´espaciu eleváu casi un metru respecto al nivel de la nave, nuna segunda fase constructiva alzóse un espectacular arcu triunfal de tres vanos, que ye la xoya escultórica del interior del templu. Pa la so instalación baltóse una estructura precedente, de la que se puen apreciar les sos buelgues güei nos murios llaterales. L´arcu nuevu componse de tres vanos de mediu puntu peraltáu, sobre columnes reaprovechaes, que rematen en capiteles corintios. Nos tímpanos de les arqueríes asitiáronse celosíes calaes. Ente los fustes dispónense los tableros y la barrotera central del cancel, con inscripciones incompletes.

Datos d´interés

Accesos

L.lena. Carretera d´Uviéu a Lleón.

Visites

Contactu:
Tfnu: 985 49 76 08 (Oficina de turismu) - 609 94 21 53 (guarda Inés Faes)

Horariu:

De payares a marzu, de 11:00 a 13:00 h. y de 16:00 a 18:00 h.

De abril a ochobre, de 11:00 a 13:00 y de 16:30 a 18:30 h.

Fuera d´esti horariu, ye menester realizar reserva previa nel 985 49 05 25.

Posibilidá d´ampliar l´horariu so demanda, recomendable llamar primeru.

Aula d´Interpretación del Prerrománicu Asturianu: martes y miércoles, de 10:15 a 14:00 h. Realizar reserva previa nel 985 49 76 08 (Oficina de turismu) .

Zarrao

Llunes Zarrao. Sacante: 1 de mayu.

Observaciones

Tarifes Santa Cristina de L.lena:
Adultos: 1.50 €

Neños de 12 a 17 años: 1 €

Neños d´hasta 3 años: 0,70 €

Grupos (+ 20 pax): 1 €

Aula d´Interpretación del Prerrománicu Asturianu, entrada de baldre.