Centro de Recepción e Interpretación del Prerrománico Asturiano
Facebook
Twitter
Instagram
Youtube
App Móvil

En Las Regueras. San Pedro de Nora

Información xeneral

El templu destaca pol altor tan eleváu del so interior, les sos considerables dimensiones y la falta d´estructures occidentales. De la mesma, ye peculiar la situación y alzáu de les dos dependencies llaterales, úniques na arquitectura altomedieval asturiana. Por ello, escapa a la tipoloxía basilical habitual, y presenta duldes sobre´l so destín inicial.

Nun conocemos menciones documentales nin cronístiques referíes al momentu fundacional, nun siendo les conteníes en composiciones documentales del Llibru de los Testamentos del obispu Pelayo d´Uviéu, de principios del sieglu XII, y cites d´una ilesia de San Pedru, na villa Naura, dataes en 1078 y 1079.

Les escavaciones arqueolóxiques feches nel templu dexaron reconstruyir la planta orixinal. Trátase d´un edificiu basilical de tres naves, con cuatro tramos sobre arqueríes de mediu puntu sofitaes en pilares cuadrangulares, y triple cabecera rectangular, de testeru rectu únicu. Cuenta con dos dependencies llaterales de planta rectangular abiertes al segundu tramu de les naves llaterales y dispuestes en doble altor, lo que constitúi una novedá nes soluciones arquitectóniques asturianes. Nun tuvieron previstos nin antecuerpu occidental, nin pórticu, nin transeptu.

Les capiyes de la cabecera tán na actualidá comunicaes ente sigo per aciu de buecos, circunstancia escepcional na arquitectura altomedieval asturiana, y común en dellos templos románicos, lo que fai abarruntar que fueron abiertes con ocasión de reformes plenomedievales. La cámara supraabsidal sobre la capiya central, reproduz el modelu de la de Santuyano, con triple buecu xerarquizáu nel tamañu, mayor el central que los llaterales.

Salvo les capiyes de la cabecera, cubiertes con bóveda de cañón, los demás espacios del templu tán cubiertos con carpintería de madera. L´apareyu dominante ye la mampostería de bloques caliares pequeños, tallaos con procuru y dispuestos en fileres horizontales, con sillares nes esquines, sobre zócalu perimetral. Los paramentos esteriores articúlense per aciu de contrafuertes de sillería atizonaos nel muriu. Los vanos, conforme l´avezáu sistema basilical asturianu, asitiense nos murios de la nave central, sobre les enxutes de los arcos de les arquerías divisories. Son de contorna rectangular. Na actualidá utilízase puramente la puerta occidental pal ingresu al interior, atayándose les puertes abiertes nes naves llaterales. A éstes ábrense tamién les puertes de comunicación coles dependencies salientes, de planta rectangular y con dos pisos, abiertu´l superior per aciu d´un buecu grande a la nave respectiva.

Apenes esiste escultura arquitectónica reseñable. Los pilares de les arqueríes divisories, de sección cuadrada, rematen nes impostes molduraes con bandes horizontales habituales, que sirven igualmente como bases. Elementos idénticos figuren nos arcos triunfales d´accesu a les capiyes de la cabecera. Al esterior, les fachaes oriental y occidental tienen modillones de rollu únicu pal sofitu de los trabes de la cubierta, asemeyaos a los que pueden vese en Santuyano o Santiso d´Uviéu.

L´aspectu actual ye la resultancia d´una llarga restauración fecha ente 1952 y 1964, qu´incluyó la construcción d´un campanariu enorme, pal que nun esisten nin fundamentos arqueolóxicos nin tipolóxicos.

Datos d´interés

Accesos
Les Regueres. Accesu dende Trubia pela AS - 233

Observaciones

Tarifes, consultar.